மக்களின் பார்வையில் மக்களாட்சி...!

கந்தை அணிந்தும் கனவுயர்ந் தேநிற்க

விந்தை நிழலுருவம் மேன்மையாய்த் - தந்துமே

முன்னேற வைக்கும் முயல்தவறா துழைக்கப்

பின்னேறும் துன்பப் பிணி.

மாற்றம் விரும்பி மக்கள் திரண்டனரே

ஏற்றம் பெறுமா இச்சூழல் - காற்றில்

கலந்த கனவு காணல் ஆகுமோ

பொங்கும் புதுமை எழும்.

மக்களின் வாக்கை மாற்றுவோம் என்றாரே

சிக்கலை தீர்ப்பரா செம்மையாய் - மக்கள்

நலம் நாடுவோர் நல்வாழ்வு தருவாரோ

வளம் நிறைந்து வருமோ.

வேற்றுமை நீங்கி ஒற்றுமை காணாரோ

போற்றுவர் மக்கள் பொலிவுடன் - ஏற்றம்

பெறுமா இத்தேச சூழல் இனிதே

தோற்றுமோ தீய செயல்.

தேனொழுகப் பேசித் தெருவெல்லாம் வாக்குறுதி

வானை வசமாக்க வல்லாராய் - ஏனோ

அரியணை ஏறின் அறிவழிந்து நிற்பார்

வரிப்பணத்தை வாங்கும் வகை.

ஆடுகின்ற பொம்மைகளாய் ஆன்றோர் அறிவுரை

கேடிலா மக்கள் கிளர்ந்தெழார் - பீடுடைய

மாற்றமென எண்ணி மயங்கி விழுகின்றார்

ஏற்றமுறு மேடைப் பேச்சு.

பழையன கழிதலும் பண்பிலார் புகுதலும்

பிழையெனத் தேயும் பிழைப்பு - சுழலுமே

வண்ணங்கள் மாறி வருமேயன்றி வாழ்வில்

உண்ணும் சோறாகா உரை.

வேடிக்கை பார்த்தே விடியலும் போனதே

நாடாளும் கள்ளர் நயம் பேசி - நாளும்

வியத்தகு நன்மைகள் கிட்டுமோ வீணே

மயக்கத்தில் ஆழும் மனம்.

பணச்சுமை ஏறிப் பகலெல்லாம் வாட

குணமிலார் ஆட்சி கொடுமை - உணவின்றி

மக்கள் தவிப்பாரே மாற்றமது வாராதோ?

தக்க வழிதான் எது.

கட்சிகள் மாறிக் கரைவேட்டி மாறினும்

நிச்சயம் மாறா நிலைமைதான் - பிச்சைபோல்

நன்மை பயக்குமோ நாடாளும் மாண்பிலார்?

புன்மை புகுத்தும் பொழுது.

#மக்களின்_பார்வையில்_மக்களாட்சி