பாதையில் கண்ட பாவையொருத்தி...!

இடப்பக்கம் காட்டி வலப்பக்கம் கைநீட்டித்

திடப்பக்கம் நேரே செலுத்தும் - மடப்பாவாய்!

சாலையில் நீயும் தனிவழிச் செல்வதற்கோ

கோலங்கள் போடுகிறாய் கூர்ந்து.

விளக்கினில் ஒன்றைக் காட்டி விரலால்

துலக்கமாய் வேறொன்று காட்டி - நிலத்தினில்

நேராகச் செல்லும் நங்கையே! நின்னையார்

பாரில் அறிவார் பரிந்து?

இடப்புறம் மின்னும் வலப்புறம் காட்டும்

திடமுற நேரே திரியும் - மடக்கொடியே

சாவி கொடுத்தும் சகதிமேல் வண்டியினைத்

தேவிநீ ஓட்டுந் திறன்.

மழைபெய்ய முன்னிற்கும் மாமருந்துச் சாலை

பிழையென எண்ணிப் புறக்கணித்து - விழைவோடு

சோறுண்ணச் செல்லும் சுடர்க்கொடியே! நின்னறிவு

வேறுண்டோ வையத்து மேல்?

பெய்கின்ற மாரி பிணியைத் தந்திடுமே

கைகாட்டும் மருந்தகம் கைகூட - மெய்யுருக

உண்ணு முணவகம் ஓடும் மடவரலே!

நண்ணுமோ நோயுனக்கு நன்கு.

நனையாதே மாரியில் நைந்துளம் நோகும்

பிணியானால் பாழாகும் நெஞ்சம் - தணிவிலாச்

சோறுண்ணச் செல்லும் சுடர்க்கொடியே! முன்னிருக்கும்

ஆறு மருந்தகம் ஆய்.

மாரி நனைய மனந்துயரம் மிஞ்சுமால்

சீரிய தேகம் சிதைந்தக்கால் - ஆரிங்கு

ஆறுதல் சொல்வார்? அயலார் உணவகமே

தேறுதல் அன்றோ உனக்கு.

கடுகிச் செல்லாதே காலன் வருவான்

நடுங்கும் இருளில் நயந்து - முடுகியே

உன்னைநீ காப்பாய் உனைநம்பி இங்கொரு

தன்னிகரில் இல்லம் தழைக்கும்.

இருண்ட வழியில் இயக்கம் தவிர்நீ

மருண்டே மிகவேகம் கொள்ளேல் - அருண்டே

உனைநம்பி வாழுமே உற்றார் குடும்பம்

நினைவிற்கொள் நெஞ்சே நிலத்து.

வேகம் தவிர்நீ விழிப்பாய் இருளினில்

ஏகும் வழியி லெச்சரிக்கை - ஆகினால்

உன்னைநீ காப்பதே உற்ற குடும்பத்தின்

பொன்னான வாழ்வெனப் போற்று.