பெண்ணுடன் கூடிக் கலந்தன்பு கூர்பொருளும்
மண்ணினில் வேறொன்றும் வேண்டுமோ - கண்முன்னே
இன்பக் கடலே இவர்தான் எனநிற்க
துன்பமும் ஏகுமே தொல்.
ஆசை மகளோடு ஆண்மக்கள் மூவருமே
பாசத் தளைபூண்ட பார்வையார் - ஆசையுள்
தஞ்ச மெனவே தழுவினர் எந்தையை
எஞ்சாப் பொருளும் இது.
பொருள்தேடி ஞாலம் புகுந்தேன் - மருணீக்கும்
கையகத்து மங்கை கலையிசைப் - பாவியலில்
தஞ்சம் புகுந்தேன் தனிமகிழ்வு வேறில்லை
எஞ்சாப் பொருளும் எமக்கு.
பொன்னும் பொருளும் புவிமீது கோடிடினும்
மின்னும் மழலைச் சிரிப்பிற்கு - எந்நாளும்
ஈடாகா தென்றே இயல்நாடகத் தமிழால்
கூடி மகிழ்ந்தோம் குலைய.
எண்திசையும் சுற்றி இளைத்தேன் பொருள்தேடி
கண்டேன் அமைதி கரம்பிடித்த - பெண்ணோடு
நால்வர் நகைக்க நறுந்தமிழில் யான்வாழ
மேல்நிலை வேறொன் றிலை.
வளந்தேடி வையகம் சுற்றியும் நெஞ்சில்
உளந்தேறாத் துன்பமே மிஞ்ச - இளங்கொடி
மெல்லியலாள் அன்பில் நறுந்தமிழோடு ஈங்கிணைந்தால்
அல்லல் அறுமே விரைந்து.
பொருள்தேடும் வேட்கை தணிந்ததுவே இன்று
அருட்செல்வ மக்கள் நால்வர் - மருள்தீரத்
தழுவி நகைக்கத் தவிடுபொடி யாகும்
வழுவில் கவலை வலி.
மண்ணில் நிதியெல்லாம் மாற்றேறும் மாய்ந்துவிடும்
கண்ணின் இமையாய் கரம் பிடித்த - பெண்ணோடு
பாடல் இயலிசை கூத்தெனும் முத்தமிழே
கூடல் குலையாத இன்பம்.
தேடினேன் வையகம் தீராப் பெரும்பொருளை
வாடினேன் நிம்மதி வாய்க்காமல் - கூடியே
பிள்ளைச் சிரிப்பில் பெருநகைக்க முத்தமிழே
அள்ளும் அமுதெனக் கொள்.
பணமே உயிரெனப் பாரெலாம் சுற்றிக்
குணமே இழந்தேன் திகைத்து - உணர்வாள்
இயலிசை கூத்தெனும் இன்கவிதை யோடு
மயல்தீர வாழ்வதே வாழ்வு.
#வாழ்வெனும்_மறைபொருள்
No comments:
Post a Comment