தனிமை விரும்பி தமிழ்க்குமரன் தான்பிறந்த
கன்னித் தமிழ்க்கரத்தைப் பற்றியே - வளர்த்துப்
பிள்ளைத் தமிழைப் பெருக்கியே நன்னெறியைக்
காட்டும் கருத்தே இனி.
கல்லாத புல்லறிவைக் காய்ந்து தனிமையிலே
நல்லார் தமிழமுதை நாடியே - வல்லாண்மை
பெற்றுப் புவிபெருகப் பேசி மகிழ்வதே
உற்ற நெறியா கும்.
கூடிப் பலபேசிப் பாழாக்கும் கொன்னெறியை
நாடான் தனிமை விழைவோன் - தேடியே
தொல்காப்பியம் தோய்ந்து கவியியற்றின் எஞ்ஞான்றும்
அல்கா அறிவா கும்.
புறத்தார் உறவை ஒழித்துப் புலனை
அறத்தாற் கவியாக்கி ஆள - நிறத்தோடு
எக்காலுஞ் சாவா இலக்கியம் ஈந்திடுவான்
மிக்கான் தமிழ்க்கும ரன்.
ஆள்மனம் நாடி அமைதி நிலைபெறவே
அமிழ்தத் தமிழை அருந்தி - எமைக்காக்கத்
தக்க அறநெறிகள் தந்தே மகிழ்வதுவே
மிக்க பெருமையா கும்.
கடல்சூழ் உலகிற் கலவாத ஏகாந்தம்
திடமாந் தமிழோடு சேரின் - உடனே
கலைமகளின் காதலெனக் காசினி போற்றும்
தலைமை பெறுதலே சால்பு.
உள்ளக் கடலைக் கடைந்துயர்ந்த செந்தமிழைக்
கொள்ளச் சுவைபடக் கூட்டியே - எள்ளளவும்
தீமை கலவாத நற்பொருள் ஈந்திடுதல்
சேம அறமா கும்.
படைப்புத் தொழிலிலே பற்றுடையான் ஏகாந்தத்
திட்பக் கவியாக்கி வைப்பான் - படைப்பின்
உயிர்த்துடிப்புத் தேடித் தனிமையிலே தோய்ந்தான்
உயிர்த்தமிழ்க் காதலன் தான்.
தனியே இருத்தல் தவமென்றே எண்ணி
இனியே தமிழோடு வாழும் - நனியாம்
தமிழ்க்குமரன் காட்டும் தகைசால் அறமே
புவிக்காச் சுடரா கும்.
காவியத் தாயின் தனிமைத் தவப்புதல்வன்
பூவியல் நற்றமிழைப் பூண்டுமே - மேவியே
ஆய்வின் வழிநின்று பிள்ளைத்தமிழ் வளர்க்கும்
தூய்மைத் தகைமைத் துணிவு.
No comments:
Post a Comment